Timeline

Tuesday, 8 May 2012

NUUS, NUUS, NUUS

Man julle, ek weet ek moet eers vertel van ons Sydney vakansie, maar ek gaan nie nou nie.  Daar is veel belangriker nuus wat ek moet deel.

Soos julle weet is ek al redelik moedeloos gewag vir die huis om te verkoop sodat ons die OZ trek planne kan begin maak.  En net soos 'n groot maagpyn ... woerts .. toe verkoop ons huis die naweek!!! 

KAN JULLE DIT GLO!!!

Ek het nie nodig om meer te worry of daar genoeg seep gaan wees en of ek 'n special moet koop of nie. Ons het nou finaliteit en ons trek datum bepaal. Ek weet nou wanneer die afsnypunt is!

DAAR IS LIG AAN DIE EINDE VAN DIE TONNEL!!!!

Saterdag ... die 5de Mei, het agente 'n paartjie na ons huis gebring om te kom kyk.  Later daardie middag bel die agent my en sê hulle wil die volgende dag 'n offer bring.  Sondag, teen 10:00 sit die twee agente hier en gee 'n pragtige offer.  Minder as wat ons oorspronklik wou gehad het, maar genoeg om ons kostes te dek.

Ons moet einde Junie uit die huis wees.  Dan sal ons vir 6 maande in die omgewing huis huur.  Soos dit nou lyk, trek ons einde Desember of vroeg Januarie Australië toe!

Dit is 'n amaizing gevoel.  So onwerklik!

Nou is daar natuurlik 'n paar takies wat wag.  Ons moet huurhuis soek.  Ek gaan seriously die huis en kaste uitsorteer sodat ons nou met so min moontlik kan trek en dan sal ons teen ons immigrasie tyd nog minder hê.  My bediende (my getroue ou Margaret) sê hoeka vir my dat dit ons 4de trek saam gaan wees in die 5 jaar wat sy vir my werk. 

Dan is daar 'n paar praktiese goedjies wat ons moet reel soos om SABC liksêns te kanseller.  Nou moet ek julle dit sê.  Toe my eerste man, Jan, in 2005 oorlede is, het dit my tot 2009 geneem om daardie inteligente mensies by SABC te oortuig dat 'n dooie persoon nie 'n liksêns kan betaal nie.  Ek dink hulle verstaan dit nou nog nie, maar het moed opgegee om met my te stry.  Hulle het na amper 4 jaar se argumente die rekening gekanselleer ... so nou vra ek julle... hoe lank gaan dit vat dat hulle gaan besef dat ons nie meer in die land TV kyk of radio luister nie en dat ons rekening maar kan kanselleer?

Die TV Liksêns lê soos 'n berg voor my.

Ek wil ook graag 'n ordentlike afskeids partytjie vir ons reël.  Ek gaan probeer om dit te kombineer met my 39ste verjaarsdag in Desember. So 'n pre-forty birthday bash?

Nou ja, laat ek my aan die gang kry en die kaste begin sorteer.  Daar is baie wat wag. 

Sodra ek 'n kansie kry, belowe ek om 'n paar fotos' van ons Sydney vakansie op te sit. In kort .. dit was 'n baie lekker en suksesvolle vakansie!

Tot later ...