Timeline

Tuesday, 4 December 2012

Ek is poegaai!!!

Kyk, my ma sê altyd: "Trek is net so 'n ou klein woordjie, maar dit is 'n baie groot werk"  Nou ja, ek kan daarmee byvoeg en sê dat Emigrasie 'n groot woord is, maar dat dit nie naby so groot is soos die werk wat dit meebring nie"!

Dit voel vir my of ek al maande lank aaneen uitsorteer (Ek dink ek doen dit nou al vir maande!!) Elke ding wat ek optel is "container, tas, weggee, verkoop of weggooi".  Alles het 'n plek in een van daardie kategorieë en glo vir my ... dit maak met verstandelik moeg om oor alles te dink. EK IS POEGAAI GEDINK!

Ek het oral op my kaste van hierdie post-it notes wat duidelik aandui ... Container of Tasse.  Dit beteken dat die goed in die tasse is waarmee ons vir 3 maande moet oor die weg kom terwyl ons vir die container wag.  Elke ding wat container toe, word baie goed oorweeg of ons sonder dit kan oorleef vir 3 maande!

Dit is nogal verbasend om te sien met hoe min goed jy werklik oor die weg kan kom!

Ons het vandag die kombuis en veral die spens getakel.  Ek het al die oorblywende kossies soos pastas, ens uit hul houertjies in sakkies gesit en al die houertjies is gewas en reg vir die container.  Nou moet ons binne die volgende maand al daardie sakkies kossies opeet.  Ons gaan beslis elke aand uiteet - uit blikkies en sakkies uit.

Al wat nog oorbly om uit te sorteer is my klere en die kinders se speelgoedkas.  Verder is die hele huis uitgesorteer en ons is op 98% reg vir die container.

Verder het ons 'n werker gekry om ons te kom help om al die fietse, kamptoerusting en die gereedskap skoon te maak.  Dit word nou veilig in die spaarkamer gebere, sodat dit nie terug garage toe nie!

Ek belowe vandag hier dat ek NOOIT, OOIT weer so baie goed bymekaar sal maak nie!!! Dit is moer harde werk om alles uit te sorteer. Ek hoop werklik dat hierdie 3 maande sonder my "goed", my sal leer dat ek nie so baie goed nodig het nie.  Dit is back to basics vir my!!!